Heilsugæslan Salahverfi - Salavegi 2 - 201 Kópavogi - Sími 590 3900

Starfssemi Heilsugæslunnar í Salahverfi hófst 20. janúar 2004. Rekstrarformið er á grundvelli útboðs og er nýtt hvað varðar heilsugæslustöðvar hér á landi. Meginmarkmið ráðuneytisins með útboði reksturs heilsugæslustöðvarinnar var að auka aðgengi, hagkvæmni og skilvirkni í heilsugæslunni. Einnig að tryggja samfellda, aðgengilega og heildræna þjónustu.

Einkahlutafélagið Salus rekur heilsugæslustöðina samkvæmt samningi milli félagsins og heilbrigðis- og tryggingamálaráðuneytisins sem undirritaður var í maí 2003. Salus ehf., sem er í eigu læknanna Böðvars Arnars Sigurjónssonar og Hauks Valdimarssonar, átti hagstæðasta tilboð þeirra er buðu í reksturinn, bæði hvað varðaði mat á faglegum þáttum og verð.

Heilsugæslunni í Salahverfi er fyrst og fremst ætlað að leggja áherslu á kjarnaverkefni heilsugæslunnar í þjónustu sinni, þ.e. almenna læknis- og hjúkrunarþjónustu, meðgönguvernd, ungbarnavernd og skólaheilsugæslu. Heimahjúkrun á þjónustu heilsugæslustöðvarinnar er þjónað miðlægt af Heilsugæslunni í Kópavogi.

Þjónustusvæði Heilsugæslunnar í Salahverfi nær til Linda-, Sala-, Kóra- og Vatnsendahverfa í Kópavogi. Auk ofangreinds þjónustusvæðis er einnig gert ráð fyrir að til stöðvarinnar geti leitað fólk úr öðrum hverfum Kópavogs svo og nágrannasveitarfélögum. Einnig fólk með lögheimili utan höfuðborgarsvæðisins en dvalarstað þar, svo sem námsmenn af landsbyggðinni. Skráðir skjólstæðingar Heilsugæslunnar í Salahverfi eru nú haustið 2008 tæplega 11 þúsund.

Markmið Heilsugæslunnar í Salahverfi er að veita skjólstæðingum sínum góða þjónustu. Góð heilsugæsla einkennist af góðu aðgengi og samfelldri þjónustu sem veitt er á viðeigandi hátt. Starfsfólk Heilsugæslunnar í Salahverfi leggur þess vegna mikla áherslu á gott aðgengi að þjónustunni, sem síðan mun leiða af sér hin meginatriði góðrar heilsugæslu, þ.e. möguleikum á samfelldri þjónustu veittri á viðeigandi hátt.