Opnunartími frá 08 - 17


Vinsamlegast kynnið ykkur nýjustu fréttir vegna COVID-19 veirunnar – fréttirnar eru uppfærðar reglulega. Fara á vef Landlæknisembættisins
 

Þar sem aldursmörk fyrir notkun Astra Zeneca bóluefnis eru mismunandi eftir kynjum er rétt að tilgreina sérstaklega hvaða transfólk ætti frekar að fá önnur bóluefni:

  • Transkarlar undir 55 ára:
    • skráðir sem karlar í Þjóðskrá: Hafa samband við heilsugæslu til að fá merkingu til að fá annað en Astra Zeneca bóluefni
    • Ef skráning í Þjóðskrá er „kona“ á þegar að vera merking í bólusetningakerfinu að fái ekki Astra Zeneca bóluefni
  • Transkonur:
    • Ef hormónameðferð en skráning í Þjóðskrá „karl“: Hafa samband við heilsugæslu til að fá merkingu til að fá annað en Astra Zeneca bóluefni
      • Ef ekki hormónameðferð er ekki ástæða til sérstakra ráðstafana.
    • Ef skráning í Þjóðskrá er „kona“ á að vera merkt að fái ekki Astra Zeneca bóluefni ef undir 55 ára aldri.
    • Transkonur eldri en 55 ára á hormónameðferð ættu að hafa samband við heilsugæslu til að fá merkingu til að fá annað en Astra Zeneca bóluefni. 

Sóttvarnalæknir

Smitrakningarapp embættis landlæknis og almannavarnadeildar Ríkislögreglustjóra (Rakning C-19) hefur verið uppfært og nýtir nú Bluetooth-virkni snjalltækja til að styðja við rakningu smita. Ítarlega verður fjallað um uppfærsluna á upplýsingafundi á morgun, miðvikudaginn 12. maí.

Þessi nýja útgáfa appsins gerir smitrakningarteymi almannavarnadeildar kleift að rekja hugsanleg smit þar sem tengsl milli aðila eru ekki þekkt og því erfiðara að rekja. Sem fyrr er engin afsláttur gefinn á vernd persónuupplýsinga og öryggi smáforritsins; áfram verða öll gögn vistuð á símtækinu sjálfu, ekki skýinu eða í gagnagrunni; áfram eru gögn aðeins geymd í 14 daga í tækinu; alfarið er notast við ópersónugreinanlegar og handahófskenndar gagnasendingar milli tækja.

Þróun appsins er á vegum embættis landlæknis í samvinnu við aðra hýsingar- og þróunaraðila. Öryggisúttekt var gerð á appinu og jafnframt var mat Persónuverndar fengið á virkni þess.

Hvernig virkar appið?

Rakning C-19 notar Bluetooth-merki símtækja til að reikna út fjarlægð milli tækja. Símarnir skiptast á ópersónugreinanlegum upplýsingum, eða svokölluðum lyklum, auk þess sem appið sækir reglulega upplýsingar um lykla sem hafa verið sendir frá öðrum tækjum. Þegar einstaklingur sýkist af COVID-19 og er með appið biður rakningarteymi almannavarnadeildar viðkomandi að senda lykla úr appinu. Ef sími sækir upplýsingar um lykil sem hann hefur séð áður fara útreikningar af stað sem meta líkur á útsetningu.

Ef símarnir hafa verið í minna en 2 metra fjarlægð í 15 mínútur kemur upp tilkynning um hugsanlega útsetningu. Þegar einstaklingur fær slíka tilkynningu getur viðkomandi fylgt leiðbeiningum í appinu um skráningu í smitgát og jafnframt fengið boð í sýnatöku.

Skráning í smitgát er ákvörðun hvers og eins notanda. Tilgangurinn er fyrst og fremst að gera hverjum og einum kleift að grípa til ráðstafana, takmarka samneyti við aðra, huga enn betur að einstaklingsbundnum sóttvörnum og fá sjálfkrafa boð í sýnatöku.

Hver er ávinningurinn?

Smitrakning hefur skipt sköpum í viðureign okkar við heimsfaraldur COVID-19. Á þessum tímapunkti, þegar margir hafa fengið bólusetningu og fyrirsjáanlegt er að samfélag okkar verði opnara og að meira verði um ferðalög hingað til lands, er einkar mikilvægt að smitrakning verði áfram skilvirk og árangursrík. Þær breytingar sem fyrirsjáanlegar eru, t.d. varðandi aðgerðir innanlands og á landamærum, munu gera smitrakningu flóknari. Ný útgáfa Rakning C-19 er liður í að auðvelda þá vinnu.

Nánar upplýsingar veitir Kjartan Hreinn Njálsson, aðstoðarmaður landlæknis, í netfanginu This email address is being protected from spambots. You need JavaScript enabled to view it..

Alma D. Möller
landlæknir

Þórólfur Guðnason
sóttvarnalæknir

Nú hafa þau sem fengu fyrri skammt af AstraZeneca í febrúar fengið boð um að koma í bólusetningu á fimmtudaginn til að fá seinni skammtinn.
 
Í boðuninni var ekki möguleiki að sleppa konum fæddum 1967 eða síðar.
 
Þessar konur geta valið hvort þær fá AstraZeneca fimmtudaginn 6. maí eða Pfizer þriðjudaginn 11. maí.

Frekar er mælt með því að seinni sprautan sé líka AstraZeneca ef konan er sátt við það.
 
Þær þurfa ekki að láta vita hvort þær velja, heldur mæta á réttum degi miðað við hvort bóluefnið þær velja. Þær munu fá nýtt boð.

Frétt uppfærð 5. maí

Konum fæddum 1962–1966 sem ekki hafa áhættuþætti sem auka hættu á segamyndun skv. minnisblaði blóðmeinafræðinga til sóttvarnalæknis 9.4. sl. verður boðin bólusetning með Astra Zeneca bóluefni. Yngri konur munu fá boð í önnur bóluefni.

Körlum fæddum eftir 1962 sem ekki hafa áhættuþætti sem auka hættu á segamyndun skv. minnisblaði blóðmeinafræðinga til sóttvarnalæknis 9.4. sl. verður boðin bólusetning með Astra Zeneca bóluefni.

  • Einstaklingar sem hafa aukna hættu á segamyndun að mati blóðmeinafræðinga sem þegar hafa fengið einn skammt af Vaxzevria munu verða boðaðir í mRNA bóluefni, í flestum tilvikum bóluefni frá Pfizer, þegar 12 vikur eru liðnar frá fyrstu bólusetningunni.
    • Einstaklingar sem hafa þegar fengið einn skammt af Astra Zeneca bóluefni án vandkvæða munu geta fengið seinni skammt með Astra Zeneca ef þeir óska þess þótt gert sé ráð fyrir að þeim verði boðið mRNA bóluefni þegar 12 vikur hafa liðið frá Astra Zeneca bólusetningunni. Nánari skýringar verða birtar þegar endanlegt fyrirkomulag er komið á hreint.
    • Einstaklingar sem ekki þiggja þessa bólusetningu þegar boð berst geta fylgst með auglýsingum í opna daga í bólusetningar fyrir þennan aldurshóp eða haft samband við heilsugæslu á sínu svæði til að fá upplýsingar um hvaða daga bólusetning er í boði en fá ekki aftur boð úr miðlæga kerfinu. Líklegt er að sama bóluefni verði notað á opnum dögum þar til framboð annarra kosta eykst.
    • Einstaklingar sem fá boð í Vaxzevria bólusetningu sem eru með áhættuþætti bláæða-blóðsega skv. minnisblaði blóðmeinafræðinga þurfa að hafa samband við heilsugæslu sem fer yfir sjúkrasögu og getur séð til þess að viðkomandi fái frekar mRNA bóluefni ef tilefni er til.
    • Ekki er hægt að óska eftir öðru bóluefni á grundvelli persónulegra óska eða annarrar sjúkrasögu einstaklinga, hvorki hjá heilsugæslu né sóttvarnalækni.
    • Læknar sem telja ástæðu til að aðrar sjúkdómsgreiningar en þær sem koma fram í minnisblaði blóðmeinafræðinga fái merkingu fyrir ákveðið bóluefni þurfa að hafa samband við sóttvarnalækni.

Minnisblað blóðmeinafræðinga frá 8. apríl sl.

 

Hvar erum við?

Heilsugæslan Salahverfi
Salavegi 2 - 201 Kópavogi
Sími
590 3900
Almennur opnunartími frá 08 - 17